من طرف ???? الخميس يوليو 02, 2009 3:35 pm
لو بطلنا نحلم نموت دى كانت بعض الكلمات التى كونت جملة فى اغنية للمطرب محمد منير غناها من حوالى 10 سنين .. كلمات كان كل هدفها و كل معانيها انها توصل للانسان انه لازم يحلم لانه بحلمه حيبعث حياته من جديد و توقف الاحلام سيؤدى الى هلاكه لامحالة ولكن .. اذا كان تاخر محمد منير فى اصدار هذه الاغنية لمدة هذه العشرة سنين لعلم ان هذه الاغنية ما هى الا خداع × خداع ..
لان و بكل بساطة حلمنا ؛ حلمنا بان يكون لبلدنا مكان وسط الدول الكبرى و الحمد لله الحلم اتقلب لكابوس بعد الاهانات الدولية اللى اتقدمت لينا من مختلف الدول و ابسطها اسرائيل و عدم توقفها عن العدوان على غزة ..
حلمنا و حلم كل شاب انه يسافر لاوروبا بس الحلم اتقلب لكابوس بيلاقى نفسه فيه وسط ميه لونها ازرق غامق تقترب للاسود تقول له انت هالك لا محالة ..
حلمنا بتحرير سينا و فى لحظة ظنينا ان الحلم اتحقق بس فقنا على كابوس ان الاسرائيلى واقف جنبى بيشترى خضار جنبى من نفس المحل و لو قلتله اطلع بره حروح ورا الشمس ..
حلمنا بان الناس تعيش و تتخلص من الفقر و كل اسرة فقيرة فى مصر بتحلم انها تسيب العشوائيات و تسكن فى شقق و للاسف برده بيفوقوا على كابوس انهم بقالهم اكتر من 30 سنة عايشين فيها و انهم بدل ما كانوا عشة او عشتين يمثلوا عشوائيات اصبحوا الاف زى الفران و الخنازير بيكلوا الزبالة ..
حلمنا اننا نخفض من عدد السكان و الزحام و نفوق على كابوس اننا بقينا 85 مليون فرد ..
حلمنا اننا نقضى على السحابة السوداء التى تغطى القاهرة و اعتقدنا ان الحلم اتحقق بس الحقيقة انه اتقلب لكابوس بيقول ان السحابة السوداء بتغطى مثر كلها حاليا ..
حلمنا بالقضاء على الفيروسات القاتلة و فقنا على كوابيس مش كابوس واحد؛اخدوا اسماء زى السارس و انفلونزا الطيور و انفلونزا الخنازير ..
حلمنا اننا نوصل لكاس العالم و فوقنا على كابوس بيقول ان مصر حتنظم داس العالم بل ان البعض صدق الحلم و فقنا على كابوس مكتوب بالحروف اللاتنية و ينطق باللاتينى باسم " زيرو " و يرسم هاكذا o و للاسف البعض تجاهل ان معناه بالعربى صفر ..
حلمنا ان الامية تنتهى و ان الكل يعرف القرائة و الكتابة و فقنا على كابوس بيقول ان الكل عرف القراءة و الكتابة بس مستواهم الاخلاقى فى انهيار ..
للاسف حلمنا احلام كتير و كتير و كلها بتتقلب كوابيس و فى اللحظة دى عرفت ان كلام الاغنية غلط × غلط لان الحلم بيتقلب لقابوس بيقتل بالبطىء زى سم الافعى بالظبط بس فى الاخر ارجع و اقول انا ليه اغلطه مهى مجرد اغنية زى اى اغنية ..
كلامى ده مش دعوة للتوقف عن الاحلام لان الحلم بيداهم اى شخص و لو اراد التوقف عنه فلديه سبيل واحد هو عدم النوم و لن يستطيع ..
بل كلامى ده دعوة للتعقل فى الاحلام
بقلم / مصطفى الغندور
